آلیشیر باهارین ماوی گؤزلری،
اوْتلار آراسیندان دۆنیانی سۆزور.
بۇ ظریف، بۇ شئهلی بنؤوشه‌لری
خیالیم بیر قێزین تئلینه دۆزور.
یێغیرام گۆللری اوْتلار ایچیندن،
لچکلر نازلانیر صۆبحون زرینده.
کدرین سسینی ائشیدیرم من،
بۆلبولون یانیقلی نغمه‌لرینده.
بلی، اوْ اوْخویور اؤز نغمه‌سینی،
گؤیدن جه-جه گلیر، زۆمزومه دۆشور.
کیم آچیر قلبیمین گیزلی سیررینی؟!
مئشه بۇ حسرتدن مین قمه دۆشور.
سنی چوْخ سئویرم، بۇدور حقیقت!
دۆنیا دا سئوینیر گؤزل چؤهرنه.
اۆزمه‌سین قلبینی بۇ آیریلیقلار،
کدرلی باخیشلار یاراشمیر سنه.
سنی سئودیگیمدن سارالیرام من،
شاعر:قؤتئ
باهار ترانه‌لری
باهارین ایپیلیق بیر گئجه‌سینده
آچیب دسته-دسته گۆللر، چیچکلر.
اۆرک تزه عشقه دۆشمه‌سین دئیه
اؤزونو بیر قریب سۆکوتا کؤکلر.
ایندی بۇ باهاردان هانسی گۆل منیم؟!
تۇتوب بیر چیچه‌یین گؤزلرینی نم.
منی وصف ائیله‌مز بۆلبولون سسی،
اؤزومو زانباغدان گؤزله‌یه بیلسم.
بۇ دا بیر سێخینتی، گلیر زنگ سسی،
آزمیشام باهاردا، یوْلوم آغ اوْلمور.
گؤزومه باهارین باخیشی دۆشور،
اۆرگی سئهردن قوْروماق اوْلمور.
باهاردیر گؤزه‌لین بیر جۆت گؤزو ده،
عاغیل باشدان چێخیب کمنده دۆشور.
دوْلوب بۆلبولو ده، قێزیلفگولو ده،
هامی بۇ تیلسیمه، بۇ بنده دۆشور.
شاعر:قؤتئ
ترجومه:الکبر قۇباتوْو