قۆروبون قێرمیزیسی
چؤکوب داشلارین اۆستونه.
داغ سۇسور.
چای چاغلاییر.
دۆزنلیگین اتهیینده
گؤی رنگ خێرمان باغلاییر.
کؤلگه کؤلگهیه قاریشیر.
داش داشا بیتیشیر.
گۆنون یوْرغون یوْلچوسو یوْلدان کئچیر:
گؤزلری بیر تبسسوم آردینجا
بیر کدر ناخیشی بیچیر.
بایقوش اۇجادان اۇلاییر.
قۇزغونلار آغیر-آغیر،
هاوادان ائنیر بیر-بیر:
دۆزنلیکده قالمیش لئشین
گؤزلرینی دیمدیکلهییر،
اوْنون آلنیندان آشاغی
ایکی گؤی چۇخور باخیر.
قارانلیق چؤکور.
دۆزنلیک ساکیتلشیر.
گۆنون رنگلی ناغیلی
اؤز سوْنونا یئتیشیر.
بۇداقلار دالغین.
داشلار سوْلغون.
چای آغلاییر.
بایقوش اۇلاییر.
قۆروبون رنگینه قم قاریشیر.
دوْداغیمدان سوْیوق ناغیل آخیر:
قۆروبون قفهسی کؤنلومو سێخیر.
شعر:سهراب سپهری
ترجومه:مسیاغا محمّدی
نئچه واختدی بۇ ظۆلمت قارانلیقدا،
سۆکوت رنگی چؤکوب دوْداقلاریما.
کیمدیسه اۇزاقدان چاغیریر، اما
آیاغیم باتیبدیر گئجه قێرینا.
بیرجه چاتی دا یوْخ بۇ قارانلیغین،
ظۆلمت ایچیندهدیر قاپی، داش-دیوار.
اگر سۆرونرسه یئرده بیر کؤلگه،
بۇ یالنیز سنین اؤز خیالین اوْلار.
آداملارین نفهسی
سوْیوق بیر یئله دؤنوب.
بۇ بوْغوجو هاوادا
هر جۆره سئوینج اؤلوب.
گئجه جادوگر الییله
چێرپیر قاپینی اۆزومه.
من چێرپینیر، چابالاییر
اوْ هئی باخیر، گۆلور منه.
گۆندوزلر چکدیگیم هر بیر شکیلی،
آخشام دۆشن کیمی قارالدا بیلیر.
گئجهلر جێزدیغیم آغ-قارا رسمی،
گۆندوز یئتیشهرک پامبیقلا سیلیر.
نئچه واختدی منیم کیمی هامینین،
سۆکوت رنگی چؤکوب دوْداقلارینا.
بیر ترپهنیش یوْخدور بۇ ساکیتلیکده:
ال-آیاقلار باتیب گئجه قێرینا.
شعر:سهراب سپهری
ترجومه:مسیاغا محمّدی
گئجهنین قارانلیغیندا
سسسیزجه بیر رنگ اؤلوب.
اۇزاقلاردان گلن بیر قارا قۇش
مغلوبیت گئجهسینین دامیندا
اوْتوروب اوْخویور.
قلبهدن مستدیر بۇ قۇش –
بۇ قم وۇرغونو.
بۇ رنگین اؤلومویله
هر آهنگین ایپی قێریلیب.
یالنیز قوْرخوسوز بیر قۇشجوغاز
آدی سۆکوتون قۇلاغیندان
فریاد سێرغاسی آسیر.
اۇزاقلاردان گلن بیر قارا قۇش
مغلوبیت گئجهسینین دامیندا اوْتوروب –
داش کیمی، حرکتسیز.
بئینیندهکی قاریشیق صۇرتلرین اۆزرینده
سۆروشور گؤزلری.
قریبه بیر یۇخو اینجیدیر اوْنو:
گئجهنین توْرپاغیندان رنگ گۆللری بوْیلانیر.
سحر یئلینین آیاغی
عطیر یوْللاریندا بۇرخولور.
بۇ قۇش، بۇ قم وۇرغونو
هر آن حیله ایشلهدیب
دیمدیگیله بیر شکیل چکیر.
باغلار قێریلیب،
یۇخولار پوْزولوب.
یئرین رؤیالاری
رنگ گۆللرینین آچماسی ناغیلینی
یاددان چێخاریب.
بۇ یوْلدان سسسیز کئچمک گرک:
بۇ ظۆلمت گئجهنین قۇجاغیندا بیر رنگ اؤلوب...
شعر:سهراب سپهری
ترجومه:مسیاغا محمّدی